| تبليغات | X |
آناز رادیو : آراز ائلسس ۱۹۷۱: جي ايل، نووامبر آيينين ۲۷ سينده گونئي آذربايجاندا، اورمو گؤلونون ياخينليغيندا يئرلشن «سولدوز» شهرينده دوغولوب. اونون موسيقييه اولان سئوگيسي اوشاقليق چاغلاريندان بللييدير! ياواش ـ ياواش بويا باشا چاتديقدان سونرا، ايران دؤولتينين،آذربايجان تورکلرينه قارشي اولان اييرنج سيياستي اونوندا کؤنلونو آجيتماغا باشلايير! ان گنج ياشلاريندان دوغما يوردونو، دوغما ديلده اوخشاماغا باشلايير! سازييلا، سؤزويله ايللرين يوخوسونا باتميش اولوسون اويانيشا سسلهيير!
داها سونرا يازيب، اوخودوغو ماهنيلارين اوزوندن، ايران دؤولتينين تؤرتديگي بير سيرا چتينليکلرله اوزلشهرک، دوغما يوردوندان آيريلمالي اولور!
آراز ائلسس يوخاري سويهده گونئي آذربايجان ميللي اويانيش و ديرچليش روحونا ائتکي بوراخميشدير. ايندي گونئي آذربايجاندا بلکهده ايران آدلانان اؤلکهنين هر بير يئرينده، هئچ بير ميللتچي تورک تاپيلماسين کي اونون سسيني و سؤزونو دينلهمهميش اولسون و اونون سحيرلي سؤز ـ سازيندان ائتکيلنمهسين.
آراز اوزانچيليقدا يئني بير يول آچدي، ايندي چوخلو گنج اوزانلار تورک دونياسيندا اؤزهلجه گونئي آذربايجاندا اونون ياراتديغي سبکدن ائتگيلهنهرک يولونو گئديرلر. آراز ائلسس يئنيچيدير و تام آنلامدا بير «اوزان»دير.
آراز بير آيدين و دوشونر اينساندير، او اينسانليق اوزانيدير. اونون يازديغي ماهنيلاردا و سؤيلهديگي شعرلرده اؤز دوشونجهلري دالغالانير. آراز دوشونجهسيني سانسور ائتمهين بير سياستچيدير. اونون دوتدوغو يولو گؤزو قاباغيندا آپ ـ آيديندير، بو اوزدن سؤيلهديگي سؤزلرده ايبهام يوخ، او آيندينجاسينا باغيمسيزليغي آذربايجانا چاغيرير و خالقينين دوغال و ايلکين حاققي اولان، آلينيازيسيني اؤز الينه کئچيرمهسيني ايستهيير. اونون ماهنيلاريندا بوتؤو آذربايجان اولکوسو و دونيا تورکلري آراسي قارداشليغي آيدينجاسينا گؤرونور.
آراز ایفا ائتدیگی ماهنیلارا بیر آرین دیل سئچمیشدیر. او بیر سؤزلرینده جسارت و مهارتله اوغوز دیلینین بیر اورتاق لهجهسینی قوللانیر. دئمک اولو تورکچو، قازپیرعلینین ترجمان قزئتهسینده باشلادیغی یولونون آردینی اؤز سسلی کلیپلرینده گئرچکلشدیریر. آرازین دیلی یالنیز تورکیه و آذربایجاندا دئیلل اورتا آسیا تورکلری آراسیندادا دوشونوله بیلر.
آراز ميلت شاعيري دير اونو يالنيز يازديغي سؤزلر يوخ، ديللنديرديگي تئلللرده شعردير. او ایفا ائتدیگی باشقالاری یازان سؤیلره ده یئنی بیر روح باغیشلاییر و دیریلدیر. آراز ائلسس، چاغيميزين افسانوي اوزانيدير؛ ددهقورقود کيمي اورهيينه سؤز گلير و تام ايناملا اوخودوغو ماهنيلار، خالقينين اورهيينه ياتير و اونلارا ميللي روحو آشيلايير. او دوغروداندا آذربايجان حرکتينين ميللي اوزانيدير. او آدي اوستونده اولدوغو کيمي ائلينين سسيدير. آراز ائلسس خالق اوزانيدير.
آنا یوردو گؤزل آذربایجان کیمی آنجاق موتلو یاشاسین، جانی قادالاردان ایراق اولسون و تئزلیکجه اولکو آرمانینا وارسین، گون او گون اولسون کی اؤز اؤلکهسینه گئری دؤنسون و دوغما آذربایجاندا اؤزگورلوک ماهنیسینی و باغیمسیزلیق مارشینی سسلهسین. اولو تانریدان اونا داها اوغورلار و باشاریلار دیلهییریک
ماهنیلار
تؤرکؤز تؤرکؤ چاغیریز
ساواش گؤنؤ
گئجه دیر
گل قاووشاق
اؤشؤیؤره م
دییرمان
هاوا قورشون گیبی
مرد یاشا
ریحان
دریه باخ دریه
قوشلار
اورمو
اولوسوم اویان
دار آغاجی
ایران اوردوسوندا قوللوق ائده ن تؤرک لرینه
هارای هارای من تؤرکم
قهرمانلار جان وئریر
و ...
